තිරසර සංවර්ධන අරමුණු සඳහා වන ජාතික මෙහෙයුම් කමිටුවේ නිලධාරීන්ගේ අනුකමිටුව 2024.07.09 වන දින අග්‍රාමාත්‍ය ලේකම්තුමාගේ ප්‍රධානත්වයෙන් රැස්විය.

තිරසර සංවර්ධන අරමුණු සඳහා වන ජාතික මෙහෙයුම් කමිටුවේ නිලධාරීන්ගේ අනුකමිටුව අද දින අග්‍රාමාත්‍ය ලේකම්තුමාගේ ප්‍රධානත්වයෙන් රැස්විය. මෙහිදී තිරසර සංවර්ධන අරමුණු 4ට අදාළව පරිපුර්ණ, සාධාරණ, ගුණාත්මක අධ්‍යාපනයක් සහ සැමට ඉගෙනීමේ අවස්ථාව සැලසීම යන ක්ෂේත්‍රයන්ට අදාලව වර්තමාන ප්‍රගතිය, අභියෝග සහ ඉදිරි ක්‍රියාමාර්ග පිළිබඳව සාකච්ඡා කෙරිණි.

ජාතික තිරසර ප්‍රගති පුවරුව - 2023, ගෝලීය තිරසර සංවර්ධන වාර්තාව - 2024 සහ පවතින තොරතුරැ සහ දත්ත පදනම් කර ගනිමින් මෙරට අධ්‍යාපන ක්ෂේත්‍රයට සම්බන්ධ පාර්ශව විසින් අවධානය යොමු කලයුතු ගැටළු සහ අභියෝග පිළිබඳව තිරසර සංවර්ධන සභාවේ අධ්‍යක්‍ෂ ජනරාල් විසින් ඉදිරිපත් කිරීමක් සිදු කරන ලදී.

එහිදි, ශ්‍රි ලංකාවේ ප්‍රාථමික, පහල ද්විතික සහ ඉහල ද්විතික මට්ටම් වල ඉගෙනුම ලබන දරුවන් අධ්‍යාපනය අවසන් කිරීමේ අනුපාතය, ස්ත්‍රීපුරුෂ භාවය අනුව සංවිධානාත්මක ඉගෙනුම් ක්‍රියාවලියට සම්බන්ධ වී සිටින අනුපාතය, විද්‍යාව තාක්ෂණය ඉංජිනේරු සහ ගණිතය යන විෂයන්ට අදාලව ඉගෙනුම් සම්පත් පැවතීමේ අනුපාතය සහ ඉගැන්වීම සඳහා අවශ්‍ය සේවාස්ථ අවම සංවිධානාත්මක පුහුණුව ලබා ඇති ගුරුවරුන් ප්‍රතිශතය යන තිරසර දර්ශකයන්ට අදාලව අධීක්ෂණය සහ ඉදිරි සැලසුම් සඳහා යාවත්කාලීන දත්ත නොමැතිවීම පිළිබඳව විශේෂයෙන් අවධානය යොමුකරන ලදී.

එමෙන්ම, විදුලිය, පානිය ජල පහසුකම්, ස්ත්‍රීපුරුෂ භාවය අනුව වෙන්කරන ලද ස්වස්ථතා පහසුකම්, මුලික අත් සේදීමේ පහසුකම් යනාදී යටිතල පහසුකම් සහිත පාසල් සම්බන්ධයෙන් නිවැරදි තොරතුරැ සම්පාදනය මෙන්ම පරිඝණක, අන්තර්ජාල පහසුකම් ඇතිකිරිම සහ තොරතුරු තාක්ෂණ සංනිවේදන කුසලතා සදහා ධාරිතා වර්ධන ක්‍රමවේද ක්‍රියාත්මක කිරිම පිළිබඳව වැඩිදුරටත් සාකච්ඡා විය.

මෙ‍ම අවස්ථාව සඳහා අධ්‍යාපන අමාත්‍යාංශය, තොරතුරු තාක්ෂණ අමාත්‍යාංශය, මුදල් අමාත්‍යාංශයයේ නිලධාරීන් මෙන්ම අධ්‍යාපන අමාත්‍යාංශයට අනුබද්ධිත ආයතනවන ජාතික අධ්‍යාපන ආයතනය, ශ්‍රි ලංකා වෘත්තීය පුහුණු අධිකාරිය, ජාතික ආධුනිකත්ව හා කර්මාන්ත පුහුණු කිරීමේ ආයතනය, කාර්මික අධ්‍යාපන හා පුහුණු කිරීමේ දෙපාර්තමේන්තුව, ශ්‍රී ලංකා නව නිපැයුම් කරුවන්ගේ කොමිෂම, තෘතික හා වෘත්තීය අධ්‍යාපන කොමිෂන් සභාව, නවීන තාක්ෂණය පිළිබද ආතර් සී ක්ලාක් ආයතනය, ජාතික නවෝත්පාදන නියෝජ්‍යායතනය, ලංකා ජර්මානු කාර්මික අභ්‍යාස ආයතනය නියෝජනය කරමින් ආයතන ප්‍රධානින් රැසක් සහභාගී විය.